窩輪五招 夾死散戶
[[壹週刊] 大錢題:窩輪五招 夾死散戶
上週一，窩輪成交金額衝破一百億元，佔大市總成交兩成八，漸有妹仔大過主人婆之勢。四日後，又見三十八隻招商銀行（3968）的窩輪齊發，吸水近十三億元，更打破了中行首日發三十三隻窩輪的紀錄，愈玩愈大。散戶炒輪，一心搏刀仔鋸大樹，有時卻遭庄家用盡超闊的買賣差價、神秘的引伸波幅，甚至延遲開價等招數暗算。負責監察市場的港交所及證監會，上週卻掉轉槍口，落實放寬增發窩輪的要求，為庄家魚肉散戶大開方便之門。上週五早上，未到十點開市，一班炒輪常客已在觀塘一家證券行打躉，熟練地按著股票機，七嘴八舌地討論著窩輪走勢。甫開市，恒生指數高開二十九點，照道理與恒指掛的窩輪應跟隨上升，散戶鄭先生卻大嘆：「我又中伏啦！買隻恒指call輪（3867），買中方向，都唔升。窩輪就係咁，應該升時候，佢唔一定會升；但應該跌時候，佢一定會跌。」散戶邊罵邊買，造就香港成為全球最大的窩輪市場。截至今年六月底，市場上有近一千五百隻窩輪掛牌，總市值約一千六百億元，上半年總成交額逾七千五百億元。窩輪發行商每年手握過萬億元生意額、過千億元盈利，卻仍然要賺到最盡，千方百計的魚肉散戶。第一招開價歎慢板窩輪市場奉行庄家制，跟股票的玩法有別。輪商須委任集團旗下或相熟的證券行擔任庄家（流通量提供者，LiquidityProvider）一職，每天負責開出窩輪的買入價及賣出價。自從港交所收窄細價股的買賣差價後，很多以前玩即日鮮的散戶，都轉而炒輪。他們買賣分秒必爭，輪商卻以慢板應對，甚至遲遲不肯開出買賣價格。若窩輪交投暢旺，投資者還可以自行對盤，搵買家接貨。最慘是窩輪乏人問津，甚至出現零成交時，市場上唯一買家便只有發行商，對方不開價，投資者只能乾著急。全職投資者阿浩說：「好似上週四咁，隻比聯恒指call輪（3435）過十點三都唔開價，我睇住個市係咁升，但佢就係唔開，叫我點沽貨呀？」當日恒指高開四十四點，阿浩本來打算見好即收，但他想賣也不知市價。「我咪打電話俾佢（比聯），問佢醒未，做咩唔開價？點知打完俾佢之後過成五分鐘，都係唔開！」手持五百萬份恒指認購輪的阿浩，原本可賺兩、三萬元，等到輪商終肯出價時，恒指升幅已經收窄，回報只餘數千元。一旦遇上市況急轉，輪商的慢動作足以累死街坊。香港投資者學會主席譚紹興踢爆：「有D發行商計到自己要蝕錢，又或見到勢色唔對，就會側側膊話自己反應唔夠快，開唔切盤。」有證券行經紀教路，遇上此情況，一定要投訴：「不斷打去熱線，嘈到佢開價為止。」第二招：超闊買賣差價散戶損手，有人或歸咎其道行未夠。可是，最近連熟悉遊戲規則、金股匯什麼也炒的申銀萬國基金經理黃國英，也被輪商弄得無名火起。上週三，黃國英打算替客戶沽出中銀認購輪，市值約三十多萬元，開市後卻一直未見開價。「打去問價，佢竟然問我想沽定想買。我覺得佢想睇住開價，有冇搞錯！」他氣道。有業內人士直言：「問個客想買定想沽，其實想開個衰價俾你歎！」如花旗的恒指認購輪（2121），明年三月底才到期，上週五開出的買入價為三角六仙，賣出價為四角一仙，相差十個價位。即是說，輪商以四角一仙賣輪予投資者後，只肯以三角六仙收回，就算股市沒有任何變動，投資者無端端都要硬蝕一成三。質問輪商，他們大都聲稱，因正股流通量不足，無法對沖風險，故有必要擴闊買賣差價云云。不過，有輪商私下對記者說：「恒指冇流通量問題，恒指輪差價通常只係一格（價位），十格就真係誇張D！」第三招：谷大成交誘落疊當然，要賺到盡，必先引君入甕。聘請財經演員上報刊、電台及電視台宣傳推銷，是最常見的攻勢。譚紹興坦言看不過眼：「依家電視、電台講窩輪，好似促銷咁。成日話睇好匯豐就買呢隻，睇跌就買個隻啦！證監會對輪商監管，做得唔足。」本刊搜集了七至八月期間，報章上重點推介過的四十隻窩輪，發現足足半數在見報後，成交量會大幅增加至過百億元。但不到兩週，成交便會銳減至數十萬元，甚至零成交。最極端的例子要數法興的中行認購輪（9553），該輪於七月十三日上市後，法興曾登報宣傳，「提醒」投資者該輪買盤踴躍，可多加留意。廣告一出，成交金額果然活躍起來，最高單日達二百七十萬元。不過如此盛況只持續了九日，之後就如軟腳蟹般，持續錄得零成交。接著的兩個月內，法興另外新推七隻中行輪，行使價等條款更貼市，成為新寵，9553即被打入冷宮。第四招：狂發新輪質低價格窩輪成交疏落，就怕輪商開衰價、無人接貨；成交活躍、街貨多的窩輪，投資者卻一樣要擔心輪商隨時增發，推低市價。理論上，窩輪的價格是由特定的算式（如Black-ScholesPricingModel）計算出來。因此發行商一向自辯，謂當窩輪街貨太多，偏離合理價時，若他們不增發便無貨在手，難以維持市場秩序。惟窩輪供應一多，輪價自然大跌，故進邦匯理理財分析部總監姚遷斥道：「呢條係好簡單供求定律，無端端俾人質低輪價，之前高位入貴貨投資者點算？」偏偏港交所卻站在輪商一方，於上週五宣布，窩輪發行商申請增發的條件，由以往要求街貨量達八成才可增發，降至五成。姚遷續道：「上市公司發新股，要發通告通知所有股東，等投資者有心理準備。但係窩輪只需四日向港交所申請、出張公告，就可以無限量增發，資訊透明度不足。」第五招：自導自演引伸波幅表面上，投資者只要不買價格偏離合理價的窩輪便安全。但實情是，有關的計價算式中有大堆既艱澀又難查證的變數，如「引伸波幅」，輪價合不合理，輪商始終是一言堂。本身就讀會計及財務學出身的散戶韓先生表示，去年六月，他曾購入一百二十萬份比聯思捷認購輪（4718），當時思捷股價報五十四元五角，輪價則為六角一仙。半小時後，思捷升了二角五仙，輪價反跌了一角，令他賬面蝕掉四十萬元。「我打電話投訴比聯，佢答我引伸波幅升。打去港交所，就俾人話我『唔識玩，就唔好玩！』」所謂引伸波幅，簡單點說，就是反映場外期權表現，再經輪商調整得出的數字。中大決策科學及企業經濟學系兼任講師徐燦傑表示：「現時港交所並未發出指引，規管引伸波幅的一致性。」譚紹興說得更坦白：「場外期權好神秘。」皆因尋常散戶根本不可能知道場外交易的市況，輪商說引伸波幅改變令輪價下跌，根本就是自說自話。輪商如此肆無忌憚，證監會卻謂輪商角色中立，不存在與散戶對賭的問題，反把所有責任歸咎於投資者的短炒心態。而每年收取可觀的窩輪上市費及交易徵費的港交所，亦未有為散戶主持公道。什麼是窩輪？窩輪，是英文Warrant的譯音，即認股權證，分看好的認購輪（Call）和睇淡的認沽輪（Put）。投資窩輪，其實就是買入一個權利：可在到期日，以預定的價錢，買入或沽出相關股份。以麥銀匯豐認購輪（2206）為例：行使價：$145到期日：明年三月底窩輪價格：$4（以十輪換一股匯豐計）換言之，投資者以$4買入一個權利：在明年三月底，可以$145的價錢買匯豐。屆時匯豐市價如高於$149（行使價加窩輪成本），便有利可圖；若低於此價，則窩輪成廢紙。大測試開盤等足一句鐘上週四收市後，本刊揀選了十二隻零成交的恒指認購輪，並於翌日測試各輪商開價。開價最慢記者於10:04am，發現摩根士丹利的恒指認購輪（9639）未有開價，即致電該輪的開價熱線，要求報價。職員只回應：「哦，好啦！」便掛線。當日恒指高開不久，約10:20am即掉頭下跌，但9639還未有市價。記者再次致電熱線，職員又敷衍道：「我地會開架喇！」等到10:53am，9639還是無動靜，恒指卻已跌近一百三十點。記者忍不住大發雷霆：「我等成個鐘喇！」職員才唯唯諾諾地說：「我地五分鐘內會有。」卒之等到10:59am，始見出價。假若有投資者持有此窩輪，眼見恒指不斷跌，卻無從知道自己損失多少，肯定要吃驚風散。你急佢唔急另外，本刊於早上十時左右，亦曾致電麥格理及東方匯理的熱線，要求開價，但兩行熱線均無人接聽，轉駁至留言信箱。結果，前者職員在將近五小時後才回電；給東方匯理的留言，更是石沉大海。其實，每隻窩輪的上市文件，均列明流通量提供者須持續報價（在開市後五分鐘起）或回應報價要求。若屬後者，一般要在十五分鐘內回應。如投資者遇到開價問題，應準確記低日期及時間，向港交所投訴，交由上市科調查（電話：28403895）。輪商玩殘散戶四部曲Step1：虛張聲勢新輪上市，輪商先刻意安排交叉盤，即自己同自己買賣，以谷大成交，引散戶上釣，再配合旗下的代言人及財經演員合作促銷。Step2：賤價開盤散戶落疊後，輪商將窩輪打入冷宮。窩輪成交淡靜，輪商開出賤價，掛低五至十個價位，散戶被迫沽貨平賣。Step3：質低輪價若窩輪街貨量超過五成，輪商可以輪價偏貴為由，向港交所申請增發窩輪，名正言順地質低輪價。加上輪商代言人及財經演員敦促散貨換馬，即引發拋售潮。Step4：平價回收輪價大跌後，輪商平價收貨，再將買賣差價拉闊，成功高賣低買。發窩輪賺到笑發行商賣輪，理論上要買回相關的股份對沖風險。事實上，輪商為節省成本，卻多會購買場外期權，甚至其他輪商的窩輪，對沖風險便了事。由於毋須買正股，也不一定要做足對沖，賣輪所得的資金可以用來另行投資賺錢。萬一睇錯市，輪商也可以發行ELN之類的票據，將風險轉嫁出去，是一盤穩賺的生意。據業內人士估計，輪商的毛利率可高逾一成。
